स्वामी विवेकानंद अभ्यासिकेत डॉ. बाबासाहेब आंबेडकर जयंती उत्साहात साजरी
जामखेड प्रतिनिधी
स्वामी विवेकानंद अभ्यासिकेत भारतीय राज्यघटनेचे शिल्पकार, भारतरत्न डॉ. बाबासाहेब आंबेडकर यांची १३५ वी जयंती अत्यंत उत्साहात आणि प्रेरणादायी वातावरणात साजरी करण्यात आली. स्पर्धा परीक्षेची तयारी करणाऱ्या विद्यार्थ्यांनी एकत्र येत महामानवाला अभिवादन केले.
कार्यक्रमाची ठळक वैशिष्ट्ये:
अभिवादन: कार्यक्रमाची सुरुवात डॉ. बाबासाहेब आंबेडकर आणि स्वामी विवेकानंद यांच्या प्रतिमांना जामखेड नगर परिषद चे नगरसेवक राजेंद्र गोरे, नगरसेवक प्रशांत राळेभात, नगरसेवक वसीम सय्यद, नगरसेवक इस्माईल सय्यद सामाजिक कार्यकर्ते अवधूत पवार यांच्या हस्ते पुष्पहार अर्पण करून करण्यात आला.
विचार मंथन: श्री शिंदे बी एस सर यांनी डॉ. आंबेडकरांच्या शैक्षणिक संघर्षावर आणि त्यांच्या ‘शिका, संघटित व्हा आणि संघर्ष करा’ या मंत्रावर आपले विचार मांडले.
प्रेरणादायी व्याख्यान: यावेळी सामाजिक कार्यकर्ते श्री लक्ष्मण ढेपे सर यांनी विद्यार्थ्यांना मार्गदर्शन करताना सांगितले की, “डॉ. बाबासाहेब आंबेडकर हे केवळ एका समाजाचे नेते नव्हते, तर ते ज्ञानाचे महासागर होते. त्यांच्याप्रमाणेच विद्यार्थ्यांनीही वाचनाची आणि अभ्यासाची जिद्द बाळगावी.”
“डॉ. बाबासाहेब आंबेडकरांचे जीवन हे संघर्षातून यशाकडे जाण्याचा सर्वात मोठा मार्ग आहे. स्पर्धा परीक्षेचा अभ्यास करणाऱ्या प्रत्येक विद्यार्थ्यासाठी ते सर्वात मोठे आदर्श आहेत.” असे मत सामाजिक कार्यकर्ते वैजिनाथ पोले यांनी व्यक्त केले.
विद्यार्थ्यांचा सहभाग:
यावेळी अभ्यासिकेतील विद्यार्थ्यांनी अखंड वाचन २०२६ उपक्रमाचेही आयोजन केले होते. डॉ. आंबेडकरांच्या विचारांचा वारसा पुढे नेण्याची शपथ यावेळी सर्वांनी घेतली.या कार्यक्रमामुळे अभ्यासिकेत अभ्यासासोबतच सामाजिक विचारांची देवाणघेवाण झाल्याचे चित्र पाहायला मिळाले.
यावेळी श्री अभिजीत उगलमुगले, श्री वाघ,श्री राजगुरू व सर्व विद्यार्थी उपस्थित होते.
